Gorakada chega dende a localidade vasca de Durango co propósito de facer un espectáculo multicultural dirixido ao público infantil: “La Ciudad Inventada” é unha obra recomendada para nenos e nenas dos 5 aos 12 anos de idade.
En “La Ciudad Inventada” conviven varios contos tradicionais chegados de distintos lugares do planeta, dando pé a varios encontros orixinais que enriquecerán aos seus protagonistas. O obxectivo das marionetas que percorrerán o escenario é quitar aos nenos e nenas o medo que teñen a separarse dos seus pais e nais. A historia comeza cando un neno senegalés coñece a unha nena brasileira que non pode durmir desde que o seu pai a abandonou. Os dous protagonistas, que vivían aventuras en contos distintos, comparten as súas dúbidas e os seus medos, ao descubrir que teñen máis en común do que pensaran. Maui, o personaxe dun conto tradicional neozelandés consegue derrotar a un malvado feiticeiro palestino. Ao tempo, un coello arxentino pide axuda aos seus veciños para recuperar a súa casa, que fora ocupada por un descoñecido. Esta obra que nace da fusión de varios relatos para crear unha historia única estreouse en Maitena-Abadiano o 8 de novembro de 2007. A duración do espectáculo é de 55 minutos e está recomendado para públicos infantís, a partir dos 5 anos.