A cidade de Pontevedra acolle unha nova edición de Cultur.gal, unha oportunidade única para todas aquelas persoas que queiran coñecer a oferta cultural do país en todos os ámbitos.

Organizada pola Consellería de Cultura e Turismo da Xunta de Galicia, Cultur.gal é a Feira Galega das Industrias Culturais, a feira de todas aquelas empresas e entidades que crean, distribúen, promocionan e ofrecen produtos e servizos relacionados coa cultura en Galicia e que llelos queren achegar á cidadanía.

Con ela preténdese darlle visibilidade á oferta cultural do país, nas súas diferentes versións, soportes e sectores, nun espazo onde as industrias culturais galegas poden presentar, amosar, promocionar, difundir e vender os seus produtos e servizos.

Polo tanto, o Cultur.gal é unha gran plataforma que pretende ser unha referencia imprescindible e obrigada, a xeito de cita anual, para o libro, o audiovisual, a música, as artes escénicas, os servizos socioculturais e as novas tecnoloxías da cultura e do lecer en Galicia.